Vendima 2016
O período de vendima 2016 está vivindo esta semana as súas últimas horas tanto no Ribeiro como en Valdeorras. Unhas duras semanas de colleita de uva que comezaron a mediados de setembro e estendéronse durante as últimas tres semanas cunhas condicións meteorolóxicas cambiantes, manifestándose esa inestabilidade especialmente durante as choivas dos primeiros días de vendima que deron paso a xornadas de calor case estival.
Temos que salientar que as continuadas choivas dos 6 primeiros meses do ano influíron de maneira determinante na floración de todas as variedades, xa que se produciron precipitacións de maneira constante ata ben entrado o mes de Xuño. Con todo, o traballo do equipo de viticultura, unido ao esmero e coidado dos socios nas súas viñas, conseguiu que as uvas recollidas na adega presentasen un óptimo estado sanitario e unha gradación adecuada para a elaboración dos nosos viños.
Agora iníciase o período de caída da folla e repouso vexetativo da vide, necesario para darlle o descanso suficiente que nos permita en setembro de 2017 recoller de novo o froito do noso traballo na viña durante todo o ano. Un traballo cheo de mimo e agarimo, co obxectivo de conseguir uvas da mellor calidade para transmitir nos nosos viños o espírito de Viña Costeira.
